Update riba aktividadnan di SDDKM

A jega na mi atenshon ku tin hende ta opina ku awor ku e Chevy Cobalt ta bek na merca nos mester stop ku e aktividadnan di e fundashon Danny de Kort Motorsports. Tokante esaki mi kier informa lo sigiente.

Nunca tabata e intenshon pa usa e fundashon solamente pa promoshon dje pro stock. E "doelstelling" ta pa promove motorsport en general. Ku otro palabra, nos lo sigi ku e aktividadnan dje fundashon, kual na e momento aki ta: e programa inovativo Drag Race Advertising Program (DRAP), promoshon di diferente aktividad di vehikulonan di kaya, manera e Harley-Davidson Braggin' Rights Challenge Cup, test day na C.I.R., buki di regla di FAC "pocketsize", i FulTrot. 

Alaves, e fundashon lo kontinua na aporta na konsientisashon i kontribushon na Prinses Wilhelmina Fonds i Ronald Mc Donald House Charities Foundation – Curacao, kual nos a bin ta hasi for di inisio.

Tokante e Chevy Cobalt, den fin di 2014 esaki a wordu manda merca ku e intenshon pa representa nos isla den e kategoria di T/S den IHRA racing ku mi persona tras di stur. Pero resientemente mi a disidi di dedika mas tempu na negoshi i famia. Komo tal lo mi pone e pro stock riba merkado. 

Mi ta spera di a informa sufisientemente komo ku nos ta para pa 100% transparensha.